Tovuzdakı dəhşətli qəzada ölən hərbçilər Kəlbəcərdə xidmət edirmişlər - Dəfn yerləri BİLİNDİ

Dünən axşam saatlarında Bakı-Qazax magistral yolunun Tovuzdan keçən hissəsində baş vermiş ağır qəzada həlak olan hərbçilər bu gün dəfn ediləcəklər.

"Qafqazinfo"nun əldə etdiyi məlumata görə, Azərbaycan Ordusunun baş giziri Ruslan Əhliman oğlu Qurbanov Ağstafanın Aşağı Göyçəli, baş çavuş Qabil Qaybalı oğlu Alıyev Qazaxın Alpout, çavuş Qələndər Mail oğlu Əhmədov Ağstafanın Kolxəlfəli, kiçik çavuş Turan Cavad oğlu Mehdiyev Qazaxın Dəmirçilər kəndində dəfn olunacaqlar. Çavuş Bəhlul Aydın oğlu Əliyev isə Qazax şəhərində torpağa tapşırılacaq.

Bildirilir ki, qəzada həlak olan hərbçilər Kəlbəcərdə xidmət edirmişlər. Onlar xidmət etdikləri yerdən yaşadıqları rayona qayıdarkən dəhşətli hadisə baş verib.

10:44

Tovuzdakı dəhşətli qəzada həlak olan hərbçilərdən bəzilərinin fotoları yayılıb.

Oxu.Az həmin fotoları təqdim edir:

Baş gizir Ruslan Əhliman oğlu Qurbanov

Çavuş Bəhlul Aydın oğlu Əliyev

Çavuş Qələndər Mail oğlu Əhmədov

Qeyd edək ki, dünən axşam saatlarında Tovuz rayonunun Ceyrançöl adlanan ərazisində ağır yol-nəqliyyat hadisəsi baş verib. "Mercedes" və VAZ markalı avtomobillərin toqquşması nəticəsində altı nəfər həlak olub, bir nəfər xəsarət alıb.

Ölənlərdən beşi hərbçidir. Müdafiə Nazirliyinin yaydığı məlumata görə, qəza nəticəsində Azərbaycan Ordusunun beş hərbi qulluqçusu - baş gizir Ruslan Əhliman oğlu Qurbanov, müddətdən artıq həqiqi hərbi xidmət hərbi qulluqçuları: baş çavuş Qabil Qaybalı oğlu Alıyev, çavuş Bəhlul Aydın oğlu Əliyev, çavuş Qələndər Mail oğlu Əhmədov və kiçik çavuş Turan Cavad oğlu Mehdiyev həlak olublar.

Qəzada ölən digər şəxs "Mercedes" markalı avtomobildə olan E.Həsənovdur. Onun oğlu, 13 yaşlı Z.Həsənov isə ağır bədən xəsarəti alaraq Tovuz Rayon Mərkəzi Xəstəxanasına yerləşdirilib. O, ixtisaslı tibbi xidmət üçün Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya təxliyə olunub.

Samir İsayev