Doğum günü olan Faiq Ağayev 23 il əvvəlki mahnısına yeni nəfəs verdi - VİDEO

Bu gün Azərbaycan Respublikasının Xalq artisti Faiq Balağa oğlu Ağayevin doğum günüdür. 

Oxu.Az xatırladır ki, o, 1971-ci il dekabrın 29-da Bakıda anadan olub.

1993-cü ildə Azərbaycan Dövlət Mədəniyyət və İncəsənət Universitetinin musiqili teatr aktyoru fakültəsini fərqlənmə diplomu ilə bitirib.

F.Ağayev universiteti bitirdikdən sonra Klavdiya Şuljenko adına “Xarkov-95” Beynəlxalq Retro mahnılar müsabiqəsində və “Qızıl Şlyager - Mogilyov-96” Beynəlxalq müsabiqəsində də qalib gəlib. 

Bundan sonra onun peşəkar səhnə həyatında yüksəliş mərhələsi başlayır. 1996-cı ildən Azərbaycan Dövlət Teleradio Verilişləri Şirkətinin solistidir. Həmçinin 2012-2013-cü illərdə Azərbaycan Dövlət Muğam Teatrının solisti kimi çalışıb.

1995-ci ildə müğənninin “Ola bilməz” adlı ilk albomu çıxıb. 1998-ci ildə Faiq Ağayev üç gün davam edən “10 il Sizinlə” solo konsertinə görə “İlin konserti” nominasiyasında, 1999-cu ildə isə “Dəşti” klipinə görə “İlin klipi” nominasiyasında “Humay” Milli Mükafatının sahibi olub. Həmçinin 1999-cu ildə o, “İlin müğənnisi” nominasiyasında “Grand” Milli Mükafatını qazanıb.

2000-ci il oktyabrın 28-də Azərbaycan Respublikasının Prezidenti Heydər Əliyevin fərmanı ilə Faiq Ağayevə “Azərbaycan Respublikasının Əməkdar artisti” fəxri adı verilib.

2007-ci il 7-11 yanvar tarixlərində Heydər Əliyev Sarayında 5 günlük solo konsert keçirməklə Faiq Ağayev Azərbaycan musiqi tarixində rekord müddət müəyyən etmiş olub.

2008-ci il sentyabrın 17-də Faiq Ağayevə Azərbaycan Respublikasının Prezidenti İlham Əliyevin Sərəncamı ilə “Azərbaycan Respublikasının Xalq artisti” fəxri adı verilib.

2012-ci ilin 27-30 dekabr tarixlərində Faiq Ağayevin Heydər Əliyev Sarayında 4 günlük anşlaqlı “VİDA” solo konsertləri keçib. Pərəstişkarlar arasında “Cənab Qızıl Şlyager” adını qazanan Faiq Ağayev yaradıcılıq fəaliyyəti ərzində 300-dən çox solo konsert verib.

Faiq Ağayev 2000-ci ildə ifa etdiyi “Aldatdı məni” mahnısına yeni nəfəs verib. Xalq artisti mahnını 23 ildən sonra yeni aranjimanda ifa edib.

Doğum günü olan Faiq Ağayev 23 il əvvəlki mahnısına yeni nəfəs verdi - VİDEO