Sumqayıtda baş verən partlayış nəticəsində 100-ə yaxın sakin təxliyə edilib

Yenilənib Foto Video

Dünən / 20:12 32115

Sumqayıtda baş verən partlayış nəticəsində 100-ə yaxın sakin təxliyə edilib

Sumqayıtda, 13-cü mikrorayonda baş verən partlayış nəticəsində 100-ə yaxın sakin binadan təxliyə edilib.

Oxu.Az Baku TV-yə istinadən bildirir ki, partlayışda evi dağılan vətəndaşlar aqibətlərinin necə olacağını gözləyirlər.

"Hay-küy düşdü, gördük ki, evlər dağılıb. Hamımız bayıra çıxdıq. Hələ ki heç kim heç nə demir. Çöldə qalmışıq, yəqin ki, evlə təmin edərlər", - təxliyə olunan sakinlərdən biri deyib.

Məsələ ilə bağlı Sumqayıt Şəhər İcra Hakimiyyətindən bildirilib ki, sözügedən qurum ilə Fövqəladə Hallar Nazirliyinin (FHN) Sumqayıt Regional Mərkəzi tərəfindən birgə Komissiya yaradılıb. Vəziyyət dəyərləndirilir və ictimaiyyətə məlumat veriləcək.

Ətraflı süjetdə:

13:21

Sumqayıt şəhərində, 13-cü mikrorayon ərazisində baş verən partlayışdan sonra şəhər icra hakimiyyətinin başçısı Zakir Fərəcov hadisə yerinə gələrək vəziyyətlə tanış olub.

APA xəbər verir ki, bu barədə Sumqayıt Şəhər İcra Hakimiyyətindən bildirilib.

"Hadisə nəticələrinin tez bir zamanda aradan qaldırılması üçün aidiyyəti qurumlara müvafiq tapşırıqlar verilib", - məlumatda deyilir.

11:28

Sumqayıt şəhəri, 13-cü mikrorayon ərazisində beşmərtəbəli yaşayış binasında mənzildə baş vermiş partlayışla əlaqədar Fövqəladə Hallar Nazirliyinin (FHN) qüvvələri tərəfindən axtarış-xilasetmə əməliyyatı sona çatdırılıb.

Bununla bağlı Oxu.Az-a FHN-dən məlumat verilib.

Ümumilikdə, partlayış nəticəsində 6 nəfər xilas edilib.

09:38

Bununla bağlı Oxu.Az-a FHN-dən məlumat verilib.

Bu vaxtadək üç nəfər dağıntılar altından sağ çıxarılaraq aidiyyəti üzrə təhvil verilib.

Daha çox foto burada: PhotoStock.az

08:46

Sumqayıt şəhəri, 13-cü mikrorayon ərazisində beşmərtəbəli yaşayış binasında yerləşən mənzildə baş verən partlayış nəticəsində yaralı sayı artıb.

Oxu.Az-ın əldə etdiyi məlumata görə, hadisə nəticəsində beş nəfər yaralı çıxarılıb.

Onların vəziyyətinin orta ağır qiymətləndirilir.

Aygün Mirakif

08:42

Sumqayıt şəhərinin 13-cü mikrorayonunda yaşayış binasında baş vermiş partlayışda yaralananların kimliyi açıqlanıb.

Bu barədə "Report"un yerli bürosu xəbər verir.

Bildirilib ki, hadisədə 1977-ci il təvəllüdlü Ramin Zakir oğlu Əliyev, 2007-ci il təvəllüdlü Ayxan Ramin oğlu Əliyev və 2010-cu il təvəllüdlü Familə Ramin qızı Əliyeva xəsarət alaraq xəstəxanaya yerləşdiriliblər.

08:36

03.12.2024-cü il tarixində saat 06:40-da Sumqayıt şəhəri, 13-cü mikrorayon ərazisində mənzildə partlayış baş verməsi barədə Respublika Təcili və Təxirəsalınmaz Tibbi Yardım Mərkəzinə çağırış daxil olub. Hadisə yerinə 6 təcili tibbi yardım briqadası cəlb olunub.

Bununla bağlı Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

İlkin məlumata görə, hadisə nəticəsində xəsarət alan 3 nəfər (2 kişi cinsli, 1 qadın cinsli) Sumqayıt Tibb Mərkəzinin Təcili Tibbi Yardım Xəstəxanasına hospitalizasiya olunub.

1977, 2007 və 2010-cu il təvəllüdlü şəxslər ağır yanıq xəsarətləri ilə Reanimasiya şöbəsinə yerləşdiriliblər.

Hazırda bir nəfərin vəziyyəti ağır, digərlərinin vəziyyəti isə orta ağırdır.

Qeyd edək ki, təcili tibbi yardım briqadaları hadisə yerindədir.

Əzizə İsmayılova

08:08

Sumqayıt şəhəri, 13-cü mikrorayon ərazisində beşmərtəbəli yaşayış binasında yerləşən mənzildə partlayış baş verib və dərhal əraziyə Fövqəladə Hallar Nazirliyinin qüvvələri cəlb olunub.

Bununla bağlı Oxu.Az-a Fövqəladə Hallar Nazirliyindən məlumat verilib.

Xilasedicilər tərəfindən həyata keçirilən axtarış-xilasetmə tədbirləri nəticəsində bu vaxtadək bir nəfər dağıntılar altından sağ çıxarılaraq aidiyyəti üzrə təhvil verilib.

Hazırda axtarış-xilasetmə işləri davam etdirilir.

Təhlükəsizlik tədbirləri çərçivəsində bina sakinləri təxliyə edilib.

Əlavə məlumat veriləcək.

07:42

Sumqayıt şəhərində yaşayış binasında baş vermiş partlayışda azı üç nəfər yaralanıb, bir nəfərin dağıntılar altında qaldığı güman edilir.

Oxu.Az bildirir ki, bu barədə "Report"un yerli bürosu xəbər verir.

Bildirilib ki, yaralılar xəstəxanaya aparılıblar. Hazırda hadisənin baş verdiyi ərazidə axtarış-xilasetmə əməliyyat aparılır.

07:40

Fövqəladə Hallar Nazirliyinin (FHN) Dövlət Yanğından Mühafizə və Xüsusi Riskli Xilasetmə xidmətlərinin, Sumqayıt Regional Mərkəzinin qüvvələri partlayış baş verən əraziyə cəlb olunublar.

Oxu.Az bildirir ki, bu barədə FHN-in Mətbuat Xidməti məlumat yayıb.

Əlavə məlumat veriləcək.

07:28

Sumqayıt şəhərində yaşayış binalarının birində baş vermiş partlayışla bağlı polis əməkdaşları hadisə yerinə cəlb ediliblər.

Oxu.Az bildirir ki, bu barədə Daxili İşlər Nazirliyinin (DİN) Mətbuat Xidmətindən məlumat verilib.

Qeyd olinub ki, ərazi mühafizəyə götürülməklə polis əməkdaşları tərəfindən sakinlərin təhlükəsiz şəkildə təxliyə edilməsi üçün və digər zəruri tədbirlər davam etdirilir.