Rusiya nüvə partlayışı hazırlıqlarına başladı

Rusiyada ilk dəfə olaraq "KUB-M" modul tipli mobil sığınacaqların seriyalı istehsalına başlanılıb.

Bu barədə Oxu.Az News.ru-ya istinadən xəbər verir.

Məlumata görə, bu sığınacaqlar əhalini müxtəlif təhlükələrdən, o cümlədən nüvə partlayışının işıq şüalanmasından və ərazinin radioaktiv çirklənməsindən qoruyacaq.

"KUB-M" innovativ modul qoruyucu strukturun istehsal prosesi Nijni Novqorod vilayətində yerləşən Dzerjinsk şəhərində həyata keçirilir.

Sığınacaq iki moduldan ibarətdir: 54 nəfərlik otaq və texniki blok. Sığınacağın tutumu əlavə modullardan istifadə etməklə artırıla bilər. Tərtibatçılar iddia edirlər ki, strukturun əsas üstünlüyü onun mobillik (hərəkətlilik) qabiliyyətidir. Belə ki, onu asanlıqla başqa yerə daşımaq və mövcud mühəndis sistemlərinə qoşmaq mümkündür.

"Modul sığınacağın kütləvi istehsalına başlanması vətəndaşların təhlükəsizliyinin artırılması istiqamətində mühüm addımdır. Gələcəkdə bu cür addımlar əhalinin müdafiəsi üçün yeni effektiv sistemlərin yaradılmasına gətirib çıxaracaq", - deyə bununla bağlı məlumatda bildirilir.