Rusiyanın üç vilayətində antiterror əməliyyatı rejimi elan edildi

Rusiyanın Bryansk, Kursk və Belqorod vilayətlərində antiterror əməliyyatı (KTƏ) rejimi elan edilib.

Oxu.Az rg.ru-ya istinadən xəbər verir ki, Rusiyanın Milli Antiterror Komitəsinin məlumatına görə, qərarlar Ukraynadan təxribat və terror təhlükələrinin səviyyəsinin artması ilə əlaqədar qəbul edilib.

"Kiyev Rusiyanın bir sıra regionlarında vəziyyətin destabilizasiyası üçün misilsiz bir cəhd göstərib", - komitənin məlumatında bildirilir.

Təhlükəsizliyi təmin etmək, asayişi qorumaq və obyektlərin mühafizəsini gücləndirmək üçün üç rayonda əlavə tədbirlər həyata keçirilir.

Xüsusilə, ərazilərdə müvəqqəti məhdudiyyətlərin tətbiqinə və xüsusi tədbirlərin - ictimai asayişin mühafizəsinin gücləndirilməsinə, şəxsiyyəti təsdiq edən sənədlərin yoxlanılmasına, ayrı-ayrı ərazilərdə və obyektlərdə fiziki şəxslərin olmasına qadağaların tətbiq edilməsinə, nəqliyyat vasitələrinin kənara çəkilməsinə icazə verilir.