Qlobal texniki nasazlıq: "CrowdStrike" milyardlarla dollar itirdi

"CrowdStrike" antivirusunun yenilənməsi nəticəsində "Windows" əməliyyat sistemində yaranan nasazlıq bütün dünyada hava yollarının, xəstəxanaların, bankların və təhlükəsizlik sistemlərinin işində fasilələrə səbəb olub.

Oxu.Az RBC-yə istinadən xəbər verir ki, dünya üzrə ən azı 1400 uçuş ləğv edilib və "CrowdStrike" 17.78 milyard dollar ziyana uğrayıb.

Proqram təminatı qlobal fasiləyə səbəb olan informasiya təhlükəsizliyi həlləri provayderi "CrowdStrike"nin səhmləri Bakı vaxtı ilə saat 14:30-da NASDAQ premarketində ticarət zamanı 21,3% ucuzlaşaraq 270.01 dollara düşüb. İyulun 18-də keçirilən əsas ticarət sessiyasının nəticələrinə görə, şirkətin kapitallaşması "TradingView"a görə, 83.48 milyard dollar təşkil edib.

Bakı vaxtı ilə saat 14:48-də kotirovkaların azalması 18,18% -ə qədər yavaşlayıb, səhmlər 280.7 dollara satılıb.

12:30

ABŞ-də hava yolları şirkətlərinin fəaliyyətində genişmiqyaslı nasazlıqlar qeydə alınır.

Rabitə problemləri səbəbindən "United Airlines", "American Airlines" və "Delta Airlines" kimi böyük aviaşirkətlər uçuşları dayandırıb.

Bu barədə Oxu.Az Fontanka.ru-ya istinadən bildirir.

Bəzi məlumatlara görə, Britaniyanın "SkyNews" telekanalı şəbəkədən ayrılıb, "Windows" isə fasilələrlə işləyir.

Bundan əlavə, Berlin Hava Limanı da texniki nasazlıq səbəbindən qeydiyyatda mümkün gecikmələr barədə məlumat verib.

İspaniyanın hava limanlarında da "kompüter sistemində insident" baş verib. "Aena" operator şirkətinin sözlərinə görə, bu, uçuşların gecikməsinə gətirib çıxara bilər.

Həmçinin KİV Böyük Britaniyanın bir sıra hava limanlarında və Türk Hava Yollarında da böyük qlobal nasazlıq səbəbindən uçuşların dayandırılmasından yazır.

Avstraliyada İT sistemlərinin işində də nasazlıq müşahidə olunub və bu, təkcə hava limanlarına deyil, banklara və supermarketlərə də təsir edib.

Hindistanın "Times Now" kanalının ilkin məlumatlarına görə, qlobal nasazlığın səbəbi "CrowdStrike"ın (kibertəhlükəsizlik üzrə ixtisaslaşmış şirkət - red.) son yeniləməsi olub.