Nadir avtomobil hərraca çıxarılacaq

Nadir "2010 Mercedes-Benz SLR McLaren Stirling Moss" iyulun 27-də Almaniyanın Teqernsi şəhərində keçiriləcək "RM Sotheby's" auksionunda satışa çıxarılacaq.

Bu model Stirlinq Mossun 1955-ci ildə "Mille Miglia"dakı qələbəsi şərəfinə hazırlanıb.

Avtomobildən cəmi 75 ədəd buraxılıb.

"Mercedes-Benz SLR McLaren" "Formula-1" komandası ilə birlikdə yaradılıb. Avtomobil 1999-cu ildə konsept olaraq təqdim edilib, 2003-cü ildə isə onun istehsalına başlanılıb.

Nadir nəqliyyat vasitəsinin kapotu altında 460 kVt (626 at gücü) hasil edən 5,4 litrlik V8 mühərriki var. Sınaqlar zamanı bu avtomobil 100 km/saata 3,3 saniyəyə sürətlənib.

Onun hərracdakı planlaşdırılan qiyməti 3,2-3,8 milyon avro aralığındadır.