"Sabunçu keçidi"ndə boğulan ikinci şəxsin də meyiti tapıldı

Bakı şəhəri, Sabunçu rayonu ərazisində subasmaya məruz qalmış tuneldə boğulan ikinci şəxsin cəsədi tapılıb.

Bu barədə Oxu.Az-a Fövqəladə Hallar Nazirliyinin (FHN) Mətbuat Xidmətindən məlumat verilib.

Bildirilib ki, 1995-ci il təvəllüdlü Köçəri Fərman oğlu Abbasovun cəsədi Fövqəladə Hallar Nazirliyinin əməkdaşları tərəfindən suyun altından çıxarılaraq aidiyyəti üzrə təhvil verilib.

15:59

Bakı şəhəri, Sabunçu rayonu, Asif Əsədullayev küçəsində yerləşən və yağış suları ilə dolmuş tuneldə ("Sabunçu keçidi" adlanan yer) boğulması ehtimal edilən 1976-cı il təvəllüdlü Elnur Fazil oğlu Şirinovun cəsədi Fövqəladə Hallar Nazirliyinin (FHN) əməkdaşları tərəfindən həyata keçirilən axtarış-xilasetmə tədbirləri nəticəsində aşkar edilərək aidiyyəti üzrə təhvil verilib.

Oxu.Az xəbər verir ki, bu barədə Fövqəladə Hallar Nazirliyinin və Baş Prokurorluğun yaydığı birgə məlumatda bildirilib.

Qeyd edilib ki, faktla bağlı Sabunçu Rayon Prokurorluğunda araşdırma aparılır.

Fövqəladə Hallar Nazirliyinin qüvvələri tərəfindən su basmış yerlərdən suyun çəkilərək kənarlaşdırılması, köməyə ehtiyacı olan vətəndaşların təxliyəsi və digər zəruri təhlükəsizlik tədbirlərinin həyata keçiriliməsi davam etdirilir.

15:01

Bakının Sabunçu rayonu ərazisində yağış sularının tunelə dolması nəticəsində batan iki nəfərdən birinin cəsədi Fövqəladə Hallar Nazirliyinin (FHN) qüvvələri tərəfindən sudan çıxarılıb. Digər şəxsin axtarışları davam edir.

Bu barədə Oxu.Az-ın sorğusuna cavab olaraq Fövqəladə Hallar Nazirliyinin (FHN) Mətbuat Xidmətindən məlumat verilib.

Qeyd edilib ki, Sabunçu rayonu ərazisində subasmaya məruz qalmış tuneldə 1976-cı il təvəllüdlü Elnur Fazil oğlu Şirinovun cəsədi FHN-in əməkdaşları tərəfindən suyun altından çıxarılaraq aidiyyəti üzrə təhvil verilib.

Hazırda ərazidə suyun çəkilməsi üçün işlər davam etdirilir.

14:26

Bölgələrdə və paytaxt Bakıda yağan aramsız yağış itkisiz ötüşməyib.

Oxu.Az-ın əldə etdiyi məlumata görə, paytaxtın "Sabunçu keçidi" adlanan ərazisində tunelə su dolması nəticəsində iki nəfər suda boğularaq ölüb.

Xatırladaq ki, həmin tuneldə "Ford" markalı avtomobil də batıb.

Məhərrəm Əliyev