Bakıda ailə faciəsi: Həyat yoldaşını öldürüb, sonra intihar etdi

Bakının Nizami rayonunda ailə faciəsi baş verib.

Məlumata görə, 70 yaşlı Azər Rəfiyev aralarında yaranan mübahisə zamanı 63 yaşlı həyat yoldaşı İradə Rəfiyevaya kəsici-deşici alətlə xəsarət yetirərək onu yaşadıqları mənzildə qətlə yetirib. A.Rəfiyev daha sonra intihar edərək öz həyatına da son qoyub.

Ər-arvadın qonşuları baş vermiş hadisə barədə Baku TV-yə danışıblar.

Qonşulardan biri onların arasında əvvəllər hansısa mübahisənin olması barədə heç nə eşitmədiyini bildirib.

"Eşidəndə inanmadım. Səssiz, mehriban insanlar idilər. Qonşular onlardan heç vaxt şikayət etməyiblər", - deyə o söyləyib.

Başqa bir qonşu isə deyib ki, onların heç kimlə işləri olmayıb: "Birlikdə bazarlıq edirdilər. Həmişə salam verib kefimizi soruşurdular".

Daha ətraflı Baku Tv-nin süjetində:

Bakıda ailə faciəsi: Həyat yoldaşını öldürüb, sonra intihar etdi

08:46

Oktyabrın 29-da saat 22 radələrində paytaxtın Nizami rayonu ərazisində yerləşən mənzillərdən birində 2 şəxsin ölməsi barədə rayon prokurorluğuna məlumat daxil olub.

Bu barədə Nizami Rayon Prokurorluğundan Oxu.Az-a bildirilib.

Araşdırma zamanı 1954-cü il təvəllüdlü Azər Rəfiyevin birgə yaşadıqları mənzildə arvadı 1961-ci il təvəllüdlü İradə Rəfiyevaya kəsici-deşici alətlə xəsarət yetirərək öldürməsi, daha sonra isə özünü asaraq intihar etməsinə əsaslı şübhələr müəyyən edilib.

Faktla bağlı Nizami Rayon Prokurorluğunda Cinayət Məcəlləsinin 120.1 (qəsdən adam öldürmə) və 125-ci (özünü öldürmə həddinə çatdırma) maddələri ilə cinayət işi başlanaraq istintaq aparılır.

30 oktyabr, 00:00

Bakıda qətl hadisəsi olub.

Lent.az-ın əldə etdiyi məlumata görə, hadisə Nizami rayonunun 8-ci kilometr qəsəbəsi ərazisində baş verib. Şəxsiyyəti hələlik məlum olmayan kişi əvvəlcə arvadını, sonra isə ilkin ehtimala görə, özünü bıçaqlayaraq öldürüb.

Hüquq-mühafizə orqanlarının əməkdaşları hadisə yerindən ər-arvadın meyitini aşkar ediblər. Hazırda polis və prokurorluq əməkdaşları hadisə yerində araşdırma aparırlar.